Afgreiðslustúlkan í vegasjoppunni var héluð í framan................

og varirnar á henni voru herptar eins og opið á lokuðum handavinnupoka þegar hún fnæsti framan í mig: "Eitthvað fleira"?

Ég þurfti sem sagt að fara fyrir fjörð í gær til að komast heim á kristilegum tíma, og ákvað að fá mér eina með öllu á leiðinni. Ég bað fyrir stúlkunni og setti sjálfan mig í hux gírinn þegar ég var lagður af stað aftur.

Ég hugsaði um hve við værum heppin að hafa Hvalfjarðargöngin og hve mikil breyting hafði orðið frá því að fara daglega fyrir fjörð í öllum veðrum. Nú nær maður að skjótast þetta á tuttugu mínútum, ef maður brennir í 120 á milli myndavéla í göngunum.

Þetta er skemmtilegur spölur að aka á björtu sumarkvöldi Hvalfjörðurinn, og ég fór auðvitað að hugsa um Spöl og þar af leiðandi Gísla bæjó (fyrrverandi) og hvernig við tengdumst hér á árum áður. Dóttir hans er nebblega ein af stelpunum okkar sem eru nú um þessar mundir meira umfjöllunarefni í miðlum heldur en IceSave, og var fastagestur á mínu heimili í denn.

Eitthvað finnst mér öðruvísi að segja "stelpurnar okkar" heldur en "strákarnir okkar"

Gísli hefur sterka og skýra rödd sem hljómaði stundum af krafti í forstofunni minni þegar hann spurði eftir Hallberu "litlu". Hann mætti alveg nota hana (röddina) meira til að þrýsta á tvöföldun gangnanna.

Nú þá fór ég auðvitað að hugsa um sement,  það þarf jú sement til að byggja göng.

Við eigum Sementsverksmiðju sem staðsett er í miðbæ Akraneskaupstaðar og framleiðir nokkra sementspoka á ári, auk þess að spúa yfir okkur steypuryki sem fer illa með öndunarfæri barna og lakk á bílum.

Svo skemmtilega vildi til að í morgun hitti ég starfsmann Sementsverksmiðjunar og við spjölluðum saman um hvað yrði um þetta ferlíki þegar því yrði lokað.

Hún sagði mér að Ríkið verslaði ekki við þá, heldur flytti allt sitt sement inn frá Danmörku og var frekar fúl yfir því

"Af hverju líkar þér það ekki"? spurði ég.

"Nú Ríkið á að stuðla að atvinnu í landinu" svaraði hún.

" En, spurði ég, af hverju verslið þið þá ekki við mig með þvottinn ykkar frekar en álrisa inn í Hvalfirði sem er í harðri samkeppni við smábónda eins og mig"?

Svarið fékk ég ekki.

Nú svo er mér boðið í afmæli í dag og það af þjóðþekktri manneskju, en þori varla að mæta því ég veit að þar verða svo margir þjóðþekktir einstaklingar að ég verð skotinn í kaf með ágengum spurningum um hvað mér finnist um IceSave o.fl. því mitt álit skiptir máli er það ekki?

Ég þyrfti að komast í sumarfrí og helst á listamannasetur í útlöndum, þar sem ég get unnið úr 9849 ljósmyndum sem ég hef tekið á árinu og ekki komið í verk að fullvinna.

Ég er jú listamaður.

Réttið upp hendi ef þið vitið af svoleiðis stað.

Annars er ég alltaf að því kominn að henda þessu bloggi mínu, en hef mig ekki í það.

Góða nótt, sofið rótt og vaknið hress og kát í haust...................................

Búið að opna Hvalfjarðargöngin

Við misstum af hamförunum sem gengu yfir þjóðina um helgin.......

þar sem við vorum af bæ, og er slétt sama. Eigum hvort eð er ekki von á neinu nýju fyrr en laukarnir fara að spretta með vorinu.

Það var bara tekin létt leikprufa við Langasand og Himnaríki í gær sem tókst svo gríðar lega vel al litla stelpan mín sofnaði á skikkanlegum tíma í gærkveldi.

Í morgun stóð svo til hjá mér að fara með ljósmyndarahóp Þingvallarúntinn kl 8:45 sharp að staðartíma p.nr 300, en gat ekki fengið af mér að skutla barninu síkáta heim til sín fyrr en um hádegið.

Þá var það of seint að sameinast grúppunni, svo ég fór bara aleinn og yfirgefin í Svínadalinn og skaut þar nokkrum myndum og eina Tófu.

Djö, sem það þyrfti að vera einhver nálægur sem maður gæti kippt með snögglega, í svona óundirbúna bíltúra, tilbúin með nesti, kaffi, nuddolíu og góðaskapið.

 

 

Jæja þá, allt gott um það að sinni og kveð ég ykkur með kulda og trekki, kúri ég sofandi........

Þegar þessi litla stúlka................

kom til pabba síns núna einn daginn í kreppunni miklu, mátti hann alls ekki klæða hana úr skónum.

"Bíddu, bíddu pabbi, ekki strax!"

Mamman kvaddi og útidyrahurðin lokaðist.

"Nei, ég ætla!" sagði hún og reif sig úr skónum.

Í öðrum skónum voru tveir hundraðkrónu peningar og í hinum einn fimmtíukrónu.

 

"Þú átt að kaupa "svona" bleika tölvu með Barbíleik" sagði hún og rétti fram peningana ákveðin á svip.

Hjartað í kallinum leystist upp í frumeindir.

Hann óttast að það gætu liðið mörg ár áður en bruðlað verður með svona aukakrónur til tölvukaupa ef fer fram sem horfir í pólitíkinni.

Þessi fjárdráttur verður ekki rannsakaður nánar, hvorki af VG, Samfó, Seðlabanka né sýslumanni vorum, fyrrverandi.

Jess sör. Þannig er nú það................................